Претседателот Стево Пендаровски одржа проштална средба со амбасадорката на Обединетото Кралство на Велика Британија и Северна Ирска, Рејчел Галовеј.
На средбата беа разменети мислења за севкупните билатерални односи меѓу Северна Македонија и Обединетото Кралство, како и за актуелните состојби во поширокиот регион.
Претседателот Пендаровски на средбата истакна дека Северна Македонија дава особено значење на развојот на билатералните односи со Обединетото Кралство, вклучително и на соработката во НАТО. На средбата беше констатирано дека во изминатите 4 години односите меѓу двете држави продолжија да јакнат. Претседателот Пендаровски истакна дека со членството во НАТО станавме и сојузници кои заеднички се спротивставуваат на глобалните предизвици.
Претседателот Пендаровски посочи дека нашата држава особено ја цени поддршката на Обединетото Кралство во исполнувањето на стратешките аспирации на земјата и се заблагодари за континуираната поддршка од нашата независност до денес.
На средбата беа разменети мислења и информации за актуелната состојба во однос на руската инвазија врз Украина и севкупните последици за европскиот континент.Во тој контекст, претседателот Пендаровски истакна дека исклучително важно е во наредниот период Обединетото Кралство да продолжи да ги развива односите со земјите од Западен Балкан. Претседателот Пендаровски посочи дека Северна Македонија, во рамки на своите можности, ќе продолжи да дава поддршка за Украина.
Претседателот Пендаровски се заблагодари за дипломатскиот ангажман на амбасадорката Галовеј и придонесот во развојот на македонско-британските односи и ѝ посака натамошен успех на личен и на професинален план.
