Претседателот Стево Пендаровски денеска ја посети канцеларијата на Програмата за развој на Обединетите (УНДП) во Република Северна Македонија.
Во рамки на посетата претседателот оствари средба со постојаниот претставник на УНДП, Армен Григорјан и со постојаниот координатор на Обединетите Нации во земјава, Росана Дуџак, коишто го информираа за севкупните активности, тековни проекти и програми на УНДП во повеќе клучни области во земјава.
Претседателот Пендаровски оствари средба и со вработените во канцеларијата на УНДП, на која беше разговарано за младинските политики, процесот на креирање на Националната развојна стратегија, за предизвиците поврзани со животната средина и загадување на воздухот, локалната самоуправа, самовработување, како и за други прашања коишто се во фокусот на активностите на УНДП.
Претседателот го поздрави нивниот ангажман и реализацијата на бројни проекти насочени кон подобрување на квалитетот на живот и поддршката во исполнувањето на стратешките цели на државата, и изрази задоволство од досегашната успешна соработка со УНДП, посочувајќи ја соработката во рамки на подготовката на Рамката за развој МКД2030, како и презентацијата на годишните извештаи за човековиот развој на УНДП во Северна Македонија.
Воедно, претседателот истакна дека Кабинетот и во иднина ќе продолжи активно да соработува УНДП и со останатите агенции и организации на Обединетите Нации во земјава.
