Претседателот Стево Пендаровски преку видео порака се обрати на учесниците на 71. Генерално собрание на Меѓународната федерација на здруженија на студенти по медицина, чиј домаќин е Македонската медицинска студентска асоцијација.
Претседателот Пендаровски им посака успешна конференција и порача дека му претставува чест што токму Северна Македонија е домаќин на овој голем студентски настан во областа на медицината.
Потенцирајќи ја улогата на медицинскиот персонал во услови на пандемијата на Ковид -19, претседателот ги охрабри студентите и нивните напори за брзо прилагодување на промените и примена на новите методологии и знаења.
„Пандемијата на Ковид-19 ги разоткри слабите и силните страни на здравствените системи, но истовремено влијаеше и на сите општествени аспекти, вклучително и на медицинските практики, истражувањата, размената на студенти и самите медицински студии. Сепак, вашата желба да им помогнете на другите луѓе, беше мотив за вашето брзо прилагодување на новите околности и прмена на новите методологии за масовно учење“, рече претседателот Пендаровски.
Тој истакна дека како идни здравствени работници, тие имаат можност директно да придонесат за унапредување на здравствените системи во своите земји.
„Иако пандемијата полека се повлекува стивнува, неизвесностите сè уште постојат. Многумина од вас се на пат да станат медицински и здравствени лидери во вашите заедници. Вие не само што ќе имате должност да лекувате поединци, туку и можност да придонесете за подобрување на јавното здравје, преку советување на носителите на политики и одлуки. За да ги постигнете овие задачи, ќе треба и понатаму да ги развивате вашите знаења, вештини и компетенции во повеќе различни области “, порача претседателот Пендаровски пред студентите по медицина.
