Претседателката Гордана Сиљановска-Давкова на проштална средба ја прими амбасадорката на Република Србија, Невена Јовановиќ, на која ѝ се заблагодари за посветеноста и нејзиниот професионален ангажман преку којшто придонесе за зацврстување на односите меѓу двете држави.
Амбасадорката Јовановиќ на средбата ја истакна отвореноста и конструктивноста на претседателката, посочувајќи дека во Скопје се чувствувала како меѓу пријатели. Таа нагласи дека политиката на Србија кон државава ќе остане непроменета, пријателска и со поддршка кога и да биде таа потребна.
Осврнувајќи се на трагедијата во Кочани, за која амбасадорката Јовановиќ рече дека и Србија ја доживеала подеднакво тажно како и граѓаните во државава, Сиљановска – Давкова се заблагодари за српската солидарност и укажаната помош при лекувањето на повредените во катастрофалниот пожар.
Посакувајќи и натамошен успех на професионален и на личен план, претседателката изрази верба дека амбасадорката Јовановиќ заминува од земјава со убави впечатоци и добрососедските односи ќе продолжат да се развиваат, како и започнатите иницијативи.
