Претседателката Гордана Сиљановска-Давкова го прими во проштална средба амбасадорот на Република Индонезија, Н.Е. г. Иван Богананта, заблагодарувајќи се за неговиот придонес во одржувањето на стабилни и пријателски односи меѓу двете земји.
На средбата, соговорниците изразија задоволство од позитивниот развој на билатералната соработка, посочувајќи дека важен предуслов за нејзино натамошно продлабочување e интензивирањето на политичкиот дијалог преку размена на посети на највисоко ниво.
Имајќи предвид дека Индонезија е една од најголемите економии во Југоисточна Азија, претседателката ја поздрави иницијативата за преговори за Договор за слободна трговија меѓу двете земји, како чекор кон зголемување на трговската размена. Истакнувајќи ги предностите на нашата држава низ призма на стратешката локација и пристапот до европскиот пазар, таа го потврди интересот за јакнење на економското партнерство и отвореност за индонезиските инвестиции.
Дополнително, претседателката ги акцентираше културата, науката, образованието и туризмот како области за соработка, за чие остварување е неопходно да се унапреди правната рамка и да се олесни визниот режим за граѓаните.
Посочувајќи ја конструктивната улога на Индонезија на глобалната сцена, претседателката Сиљановска-Давкова изрази надеж за продолжување на успешната соработка на мултилатерален план, во Обединетите Нации. Потенцирајќи дека мултилатерализмот им овозможува на малите и средни земји учество во процесот на одлучување за најважните глобални предизвици, таа го реафирмираше ставот за потребата од длабоки реформи на ОН и јакнење на улогата на Генералното собрание.
На средбата беа разменети мислења и за најважниот македонски надворешнополитички приоритет – членството во Европската Унија, како и за актуелните европски и меѓународни процеси и односи.
Амбасадорот Богананта изрази благодарност за поддршката од македонските институции во текот на неговиот мандат и ја потврди подготвеноста на Индонезија за проширување и продлабочување на меѓусебните односи, со акцент на економијата.
Оддавајќи му признание за првото дипломатско искуство, претседателката изрази подготвеност за продолжување на соработката со неговиот наследник.
