Претседателката и врховна командантка на Вооружените сили, Гордана Сиљановска Давкова, денеска присуствуваше на брифинг за борбената готовност на Армијата.
На брифингот, во присуство на министерот за одбрана, Владо Мисајловски и генералите во Армијата, началникот на Генералштабот, генерал-мајор Сашко Лафчиски, информираше за реализацијата на плановите, задачите и состојбата во Армијата во текот на 2024 година.
Претседателката Сиљановска Давкова беше запознаена со степенот на реализација на активностите во областите на персоналниот менаџмент, обука и вежби, операции во земјата и странство, опрема и инфраструктура, воено планирање и структура на сили, модернизација, буџетирање и финансирање.
На брифингот претседателката Сиљановска Давкова истакна дека припадниците на Армијата во континуитет ја докажуваат својата професионалност, дисциплина и подготвеност, успешно вршејќи ги своите задачи и гарантирајќи ја безбедноста, стабилноста и националната одбрана.
Претседателката ги реафирмираше нејзините заложби за продолжување на процесот на модернизација на Армијата и инвестиции во човечкиот капитал, потенцирајќи дека благодарение на посветеноста на македонските војници и офицери нашата држава беше и останува силен и доверлив партнер во регионалната и глобалната безбедност.
Во таа насока, таа го поздрави придонесот на македонската армија во колективната безбедност, преку активното учество во заедничките мисии и операции на НАТО, како и безрезервниот ангажман во справување и гасење на годинашните пожари во земјава.
Претседателката констатираше дека фактот што Армијата ужива највисока доверба и углед кај граѓаните, го потврдува нејзиниот кредибилитет и дигнитет во земјава и во странство.
Брифингот е редовна годишна обврска на началникот на Генералштабот пред врховниот командант, чија цел е претставување на состојбата во функционалните области кои имаат влијание на борбената готовност на Армијата.
