Сиљановска-Давкова со претставници на македонската дијаспора: Во процес е формирање на Совет за дијаспората како институционален облик на соработка

12 мај 2025 | Соопштенија

Претседателката Гордана Сиљановска-Давкова го врачи признанието, кое во соработка со Македонија 2025, се доделува на истакнати личности од дијаспората за нивниот придонес во економскиот развој, здравството, социјалната сфера, образованието, науката, културата и во други области.

Оценувајќи ја работата на Македонија 2025 како обединувачка, плодна, успешна и корисна, таа информираше за процесот на формирање Совет за дијаспора како институционален облик на соработка и постојана комуникација со дијаспората, којашто ќе овозможи нејзина интеграција во македонските работи.

За исклучителна научна работа признание доби д-р Светлана Мојсов, светски позната професорка на Универзитетот Рокфелер во Њујорк, која остави длабок и траен белег врз модерната медицина.

Признание за извонредната поддршка и медицинска помош доби Хуманитарното здружение „ЛецКер  а.с,б.л.“ (LetzCare a.s.b.l) од Луксембург, а наградата ја прими неговиот претседател Сафет Алили.

За претседателката хуманоста и солидарноста се вградени во нашиот код и крунисани со животната приказна и дело на Мајка Тереза. „Очекува“, рече таа, „ова признание да инспирира и многу други нашинци на правење хумани дела, особено важни за најранливите сограѓани“.

Сиљановска-Давкова истакна дека давањето признание на личности и организации од дијаспората е етички и морален чин на вреднување на добрите дела и докажување на нераскинливото заедништво со нив.

На средбата со Бордот на директори, по успешните, но и емотивни приказни на врвни бизнисмени и истакнати претставници на дијаспората се потенцираше важноста на негувањето и пренесувањето на чувството на припадност од генерација на генерација, како неопходно во зачувувањето на националниот идентитет.

Таа истакна дека со „Македонија 2025“ споделуваме иста визија: да станеме компетитивен регионален економски играч, да имаме енергетска сигурност, да бидеме држава со успешен образовен и научен систем, поврзан со вештачката интелигенција и дигитализацијата, да градиме еколошка и правна држава, со силно граѓанско општество и демократска јавност.

Укажувајќи на светскиот и европскиот амбиент на неизвесност од секаков тип, од мировен до еколошки, таа ја нагласи потребата од соработка, единство и зацврстување на односите со дијаспората во сите сфери, интегрирајќи ја во македонското општество.

Во продолжение интегрален текст од обраќањето на претседателката Гордана Сиљановска-Давкова:

Почитувани членови на „Македонија 2025“,
Почитувани припадници на македонската дијаспора,
Почитувани гости,
Дами и господа,

Оваа церемонија е во пресрет на почетокот на традиционалниот самит „Македонија 2025“ на којшто ќе дебатираат премиерот, министри, еминентни бизнисмени, експерти, претставници на државни органи и на институциите, членови на академската заедница, со цел да споделат знаења, видувања, искуства и вештини, како и да промовираат идеи и визии.

А, визијата на „Македонија 2025“ е и наша визија: да бидеме компетитивен регионален економски играч со просперитетна економија, што се развива во амбиент на енергетска сигурност, да бидеме држава со добар образовен и научен систем, поврзан со вештачката интелигенција и дигитализацијата, да бидеме еколошка држава, правна држава, потпрена како што јас понекогаш потсетувам, на Веберовиот модел на стручна и компетентна државна и јавна администрација, со почитувана епистемолошка заедница којашто, за жал, денеска заминува надвор, да имаме развиено граѓанско општество и демократска јавност.

Зачекоривме во 2025 и оваа година е вистинскиот момент за евалуација на резултатите и на дострелите на „Македонија 2025“, во предвечерието на Сизифовската работа којашто нè очекува во остварувањето на Реформската агенда и Планот за раст.

Во светски и европски амбиент на неизвесност од секаков тип, од мировна до еколошка, логичен императив е да си го обединиме сиот социјален капитал, да избегнуваме меѓусебни конфликти, да стимулираме соработка и единство, да ги зацврстиме односите со дијаспората во сите области, да ја интегрираме во македонското општество и во неговото ткиво во областите во коишто е најнеопходна, најстручна, но и најзаинтересирана.

За реформи е потребен домашен политички договор, но и договор со ЕУ и со нашите стратешки партнери, како и со дијаспората заради нејзината докажана креативност и капацитет во острата конкуренција во меѓународниот економски поредок, но и во културниот натпревар на државите, нациите и на поединците.

Се разбира, наша најголема национална обврска е да си го чуваме, браниме и негуваме националниот идентитет и неговиот интегритет и дигнитет. Да не се откажуваме од етичките вредности и принципи, да ги почитуваме, ако сакаме да се повикуваме на нив, кога другите ги кршат кон нас. Да не го забораваме општото добро – res publica и да не го жртвуваме за личните и за колективните интереси.

Верувам дека признанието оди во вистински раце, кај заслужни добитници кои персонифицираат врвно, меѓународно валоризирано знаење и успех, но и посветеност, хуманост, солидарност и патриотизам.

Драги пријатели,

Сакам да испратиме јасна порака дека давањето признание е чин на признавање дека ги чувствуваме и ги препознаваме лауреатите како наши, ги цениме и вреднуваме нивните дела, остварувања и успеси и кога не се постојано до нас, зашто секогаш се со нас, каде и да се.

Ние сме во нераскинлива врска со нашата дијаспора, од која генерација и да е: прва, втора, трета, следната.

Како мала држава, со повеќе луѓе надвор, одошто дома, енергетски зависна и економски упатена кон регионалниот, европскиот и светскиот пазар, имаме насушна потреба од динамични и блиски врски со нашинците во странство. Веќе реков, без разлика за која генерација станува збор, врските мора да се негуваат, да се шират и да се продлабочуваат. На генерациите родени и школувани далеку од земјата на нивните предци, не е доволно да им се доближи татковината како историја, како мит или како легенда, туку како вистинска, жива, реална приказна со светла и сигурна иднина. Се разбира, не треба да западнеме во илузионизам и да забораваме дека нашинците имаат две татковини, ниту да негуваме стереотипи: позитивни или негативни.

Реалноста покажува дека заемната соработка дава плодови тогаш кога придобивки од неа имаат сите инволвирани и засегнати страни и субјекти.

На крајот, би сакала да ви предочам дека Кабинетот е во процес на формирање Совет за дијаспора како институционален облик на соработка со неа, како мост и канал за постојана комуникација со дијаспората. Јас, лично, но и мојот Кабинет ви стоиме на располагање за промоција, поврзување, посредување, презентирање, консултирање, информирање, поддржување, интегрирање со домашните субјекти од различен тип и во различни области.

Сакам да ја споменам нашата работа на Дигиталниот регистар на најуспешните во дијаспората, како неопходна алатка за поврзување, вмрежување и стратешко вклучување на дијаспората во развојните процеси во татковината. Со неа целиме кон мапирање на научниците и експертите, политичките и бизнис-лидерите, културните и спортските дејци како вреден потенцијал и извор на ум, знаење, вештини и искуство, неопходни за креирањето програми и политики.

Се разбира, соработката со „Македонија 2025“ ќе продолжи во започнатите проекти, како што е традиционалниот „Охрид камп за високотехнолошка извонредност“, којшто е доказ дека соработката е можна, корисна и посакувана од најраната возраст, оти младите се нашата иднина во која треба да инвестираме.

Со ум и од срце, ви благодарам за поддршката, ви честитам на признанијата од „Македонија 2025“ и ве охрабрувам за понатамошна соработка и успеси!

Благодарам.

Категории

Categories

Kategori

Последни вести

Latest news

Lajmet e fundit

Во Њујорк одбележана 30-годишнината од македонско-американските дипломатски односи

Во Њујорк одбележана 30-годишнината од македонско-американските дипломатски односи

Претседателката Гордана Сиљановска-Давкова присуствуваше на одбележувањето на 30 годишнината од воспоставувањето на дипломатските односи со Соединетите Американски Држави, што се одржа во Њујорк. Сиљановска-Давкова порача дека посакува и во следните 30 години да го...

Сиљановска-Давкова оствари средба со Брендан Ханрахан, шеф на Бирото за европски и евроазиски прашања во американскиот Стејт Департмент

Сиљановска-Давкова оствари средба со Брендан Ханрахан, шеф на Бирото за европски и евроазиски прашања во американскиот Стејт Департмент

Претседателката Гордана Сиљановска-Давкова оствари исклучително корисна средба со Брендан Ханрахан, шеф на Бирото за европски и евроазиски прашања во американскиот Стејт Департмент на којашто се разменија ставови за повеќе актуелни прашања коишто се од заемен интерес....

Обраќање на Сиљановска-Давкова на 80. Сесија на Генералното собрание на ОН

Обраќање на Сиљановска-Давкова на 80. Сесија на Генералното собрание на ОН

Претседателката Гордана Сиљановска-Давкова денеска се обрати на генералната дебата на 80. Сесија на Генералното собрание на Обединетите Нации во Њујорк.  Во продолжение е нејзиниот интегрален говор: Почитувана претседателке на Генералното собрание на Обединетите...

Сиљановска-Давкова во Њујорк: Младите мора да бидат наши партнери во реформирањето на ОН

Сиљановска-Давкова во Њујорк: Младите мора да бидат наши партнери во реформирањето на ОН

 Претседателката Гордана Сиљановска-Давкова се обрати на сесијата посветена на 30 годишнината од Светската програма за млади, што се одржа во рамки на 80. Генерално собрание на ОН. Таа укажа на потребата младите генерации да добијат заслужено место во оформувањето на...

Изјава за медиуми по средбата со генералниот секретар на ООН Антонио Гутереш и работниот ручек приреден од Високиот претставник на ЕУ за надворешни работи и безбедносна политика Каја Калас

Изјава за медиуми по средбата со генералниот секретар на ООН Антонио Гутереш и работниот ручек приреден од Високиот претставник на ЕУ за надворешни работи и безбедносна политика Каја Калас

Новинарско прашање: Претседателке, денеска имавте средба со Генералниот секретар на Обединетите Нации, г. Антонио Гутереш. Од Обединетите Нации имаме информација дека сме добиле силна поддршка од г. Гутереш. Ве молам коментар за средбата и конкретно за поддршката....