Ученици од основните училишта „Кузман Јосифовски Питу“ од општина Кисела Вода, „Кочо Рацин“ од општина Петровец, „Кочо Рацин“ од општина Центар, „Лазо Трповски“ и „Јан Амос Коменски“ од општина Карпош, денеска го посетија Кабинетот на Претседателот и присуствуваа на церемонијата на свечено менување на државното знаме.
Овој значаен чин, извршен од припадниците на Баталјонот за почести, со цел оддавање почит кон македонското знаме како симбол и репрезент на државата, беше уникатна можност учениците, во присуство на претседателката Гордана Сиљановска Давкова, да ги почувствуваат вредностите и важноста на државните симболи.
На средбата со претседателката Сиљановска Давкова, основците ги споделија своите впечатоци од церемонијата, како и интересите за севкупното функционирање на институцијата.
Претседателката изрази задоволство од денешната посета на учениците, нагласувајќи ја важноста на денешниот чин на оддавање почит кон македонското знаме и воопшто кон државните симболи.
„Се соочив со безброј неочекувани прашања: од она за тежината на претседателската функција, преку еден претседателски ден, до прашањето дали ќе ги удостојам со посета на нивните училишта“, истакна претседателката.
За време на престојот во Кабинетот, денешните гости ги посетија и просториите во коишто се реализираат состаноци, свечености, официјални и работни средби.
