Претседателката Гордана Сиљановска-Давкова на проштална средба ја прими амбасадорката на Кралството Шведска, Ами Ларсон Џаин, на која ѝ се заблагодари за нејзината посветеност и придонесот за унапредување на шведско-македонските односи и соработка.
Обете ги потврдија традиционално добрите односи меѓу двете држави, при што, Сиљановска-Давкова нагласи дека зајакнувањето на политичките, економските, културните, образовните и други односи со Кралството Шведска останува приоритет на нашата надворешна политика.
Истакнувајќи дека ѝ претставувало чест да ја претставува Шведска и да соработува со претставниците на македонските институции и организации, како и да другарува со македонските граѓани, амбасадорката се заблагодари за гостопримството и го потенцираше исклучителниот квалитет на комуникацијата со претседателката.
Сиљановска-Давкова изрази особен респект кон личноста и резултатите од работата на Ами Ларсон Џаин, посакувајќи ѝ добро здравје и нови успеси во идните професионални и лични ангажмани.
