Претседателката Гордана Сиљановска-Давкова денеска на проштална средба ја прими амбасадорката на Соединетите Американски Држави, Анџела Прајс Агелер.
Обете уште еднаш потврдија дека двете земји, како долгогодишни сојузници, негуваат цврсто пријателство коешто почива на заемна почит и разбирање. Тие се согласија дека во изминатитегодини се интензивираше македонско–американскиот политички дијалог.
Амбасадорката Агелер на претседателката ѝ честиташе за изборот на двете членки на Судскиот совет, оценувајќи го изборот како значаен чекор кон реформирање на ова важно правосудно тело.
Сиљановска-Давкова, во име на македонските граѓани ѝ се заблагодари на амбасадорката Агелер за нејзиниот придонес во продлабочување на соработката и зацврстување на стратешко партнерство.
Таа, како пример за одличните билатерални односи, го посочи доделувањето на Орденот за воени заслуги на генерал-мајор Грегори Најт, командант на Националната гарда на Вермонт.
Амбасадорката истакна дека, и по заминувањето од Скопје, ќе продолжи да ја помага земјата во којашто поминала значаен дел од кариерата, на што претседателката се заблагодари и ѝ посака понатамошни професионални успеси.
