Претседателката Гордана Сиљановска-Давкова го прими во проштална средба амбасадорот на Австралија Даниел Емери, при што му се заблагодари за неговото сесрдно залагање и придонес во унапредувањето на односите и соработката меѓу двете земји посакувајќи му натамошни лични и професионални успеси.
Таа изрази задоволство од одбележувањето на 30 годишнината од воспоставувањето на дипломатски односи меѓу двете држави, со надеж дека Австралија ќе продолжи да биде наш партнер и сојузник во остварувањето на македонските стратешки цели и аспирации.
На средбата беше истакната важната улога на македонската дијаспора како мост за воспоставување блиски, пријателски односи меѓу двете држави.
Претседателката Сиљановска-Давкова го запозна амбасадорот со намерата за формирање на Совет за дијаспора како поттик за нејзино вклучување во македонскиот општествен живот.
На средбата беше истакната решеноста на обете држави за зајакнување на билатералните односи и проширување на соработката во различни области. Заеднички беше констатирано дека нивото на економска соработка заостанува и дека постои потенцијал за нејзино проширување и продлабочување.
Претседателката ја потенцираше одличната соработка со Австралија во рамките на ОН кадешто споделуваме слични ставови и вредности за бројни прашања.
