Претседателката Гордана Сиљановска-Давкова денеска ги прими реномираните музички уметници Гарабет, Диран и Гаро Тавитјан.
Навраќајќи се на богатото музичко творештво коешто го имаат зад себе, тие со претседателката ја споделија иницијативата за проектот „7/8 – Македонската ритмика“, чија цел е зачувување, афирмација и меѓународна промоција на еден од највредните столбови на македонскиот идентитет – македонската музичка ритмика.
За нив, специфичните непарни ритми, особено седум осминскиот, но и 9/8, 11/8, се знак за препознавање на македонскиот народ и на Македонците и истите треба соодветно да се заштитат.
Претседателката го дели мислењето на музичкото трио за потребата да се негува и штити автентичното македонско наследство, потенцирајќи дека македонскиот мелос е неспорен доказ за нашата посебност.
Изразувајќи особена почит за проектот, Сиљановска-Давкова искажа подготвеност за поддршка на идеите и иницијативите од културен и национален интерес.
