Presidentja Gordana Siljanovska Davkova priti sot Dr. Michael Barenbaum, profesor i shquar i studimeve hebraike dhe ekspert i Holokaustit, i cili në mars të këtij viti e shoqëroi atë gjatë vizitës së saj në Kompleksin Memorial të Treblinkës në Poloni
Në këtë takim morën pjesë Goran Sadikario, drejtor i Fondit të Holokaustit të Hebrenjve të Maqedonisë, Ljiljana Mizrahi dhe Todor Cepreganov.
Presidentja Siljanovska Davkova vuri në dukje rrezikun e revizionizmit historik, minimizimit dhe mohimit të Holokaustit, si dhe antisemitizmit.
Për të, Treblinka, ku u vranë 7,144 hebrenj nga Maqedonia, ose 98 përqind e komunitetit hebre në Maqedoni, paraqet përvojë thellësisht prekëse, por edhe monument që dëshmon për faktet historike, si dhe arsye që përkujtimi të shndërrohet në një traditë.
Presidentja Siljanovska Davkova falënderoi ekspertin Barenbaum për angazhimin e tij ekspertik dhe njerëzor në mbrojtjen e së vërtetës historike rreth Holokaustit kundër hebrenjve nga Maqedonia, veçanërisht për angazhimin e argumentuar mirë për ruajtjen e mbishkrimit autentik në pllakën përkujtimore në Treblinka, pavarësisht përpjekjeve për ta ndryshuar atë.
Për profesorin, prania e Presidentes, deputetëve dhe përfaqësuesve të komunitetit hebre në Maqedoni në përkujtimin e 11 Marsit – Ditës së Deportimit të hebrenjve nga Maqedonia, në Treblinka, është me rëndësi të jashtëzakonshme.
Eksperti Barenbaum kujtoi se duke shkruar emrat e hebrenjve nga Maqedonia në murin e Kompleksit Memorial, çdo viktimë do të marrë një kujtim të përjetshëm dhe mbrojtje të merituar nga harresa.
Ai theksoi rëndësinë e dokumentimit të historisë dhe edukimit të gjeneratave të reja rreth Holokaustit në të gjitha nivelet e procesit arsimor, si dhe organizimin e vizitave të studentëve në Kompleksin Memorial në Treblinka.
Drejtori i Qendrës Memoriale të Holokaustit të Hebrenjve të Maqedonisë informoi për aktivitetet aktuale, duke përfshirë iniciativën e themelimit të institut arsimor brenda kornizës së saj, si dhe për ekspozitën e nesërme kushtuar partizanëve hebrenj në Shkup.
