Новинарско прашање: Претседателке, денеска имавте средба со Генералниот секретар на Обединетите Нации, г. Антонио Гутереш. Од Обединетите Нации имаме информација дека сме добиле силна поддршка од г. Гутереш. Ве молам коментар за средбата и конкретно за поддршката.
Сиљановска-Давкова: Средбата не беше од отворен карактер, меѓутоа покрај мене беа и двајцата министри – министерот за надворешни работи и министерот за евроинтеграции. Господинот Гутереш изрази целосна солидарност со нас и целосна поддршка и обете ги врза за нашите демократски чекори, особено и за способноста за менаџирање на меѓуетничките односи. Рече дека стои зад нас и дека ова секаде ќе го повторува. Се разбира, добро е да чуете ваков став и да добиете поддршка од првиот човек на Обединетите Нации, заради неговото богато дипломатско искуство, во кое и ние сме биле вклучени како земја којашто кога имала проблеми, се нашла на дневниот ред на неговата агенда.
Новинарско прашање: Во говорите што ги имате велите дека она што се Обединетите Нации за светот, тоа е Европската Унија за Европа. Имавте средба со г-ѓата Калас и со колегите од Европа и од Западен Балкан. Како ги коментирате двојните стандарди што ги манифестира Европската Унија, конкретно кога станува збор за мали држави како нашата?
Сиљановска-Давкова: Сте чуле како ги коментирам јас двојните стандарди и минатата година, укажувам на ставање крај на двојните стандарди, бидејќи тоа не е европски манир, не е европска пракса, не би требало да биде европска пракса. Значи за мене е антиевропско однесување, но постојано се практикува во Европската Унија. Се разбира дека јас и денеска со г-ѓата Калас укажав на овој проблем, но предупредив дека проблемот нема да застане на нас, дека веќе се наѕира и во поглед на Молдавија и во поглед на Украина и дека ЕУ не е само прашање на проширување, туку дека влегувањето на Западен Балкан или реинтеграцијата на Западен Балкан во Европа, односно во моментов во ЕУ, кадешто географски, историски и културно со векови припаѓала, ќе биде многу важен лек против безбедносните дилеми што веќе се наѕираат. На потег се тие. Се разбира, како и секогаш, реков дека во тешки моменти Европската Унија успевала да биде многу креативна и можеби е сега предизвикот голем. Исто така реков дека е важно Западниот Балкан, иако сеуште не знам што значи оваа синтагма, да бидам искрена, да го перцепира како целина и дека ако има расчекор во чекорењето меѓу земјите од Западен Балкан, дека тоа може да предизвика дополнително поделби наместо обединување.
