Пред официјалниот почеток на Самитот на НАТО во Хаг, претседателката Гордана Сиљановска-Давкова одговори на новинарски прашања.
Прашање: Претседателке како помина вечерата?
Претседателката Сиљановска-Давкова: Вечерата помина сосема во ред. Друштвото беше умно, интересно. Разговаравме за сериозни прашања, најпрво за мирот и се разбира единството, кое е толку потребно за да дојдеме до конечен, како што велам јас кантов lasting peace.
Прашање: Ќе има ли единство, Самитот го карактеризираат како историски?
Претседателката Сиљановска-Давкова: Се разбира јас не можам однапред да предвидам, меѓутоа она што го видов вчера, гарантира, се разбира низ дебата, да дојдеме до единство.
Прашање: Како го коментирате усвојувањето на извештајот во Европскиот парламент? Треба да се усвои на пленарна седница, но вчера помина извештајот на Вајц. Оние амандмани што беа поднесени од бугарски европратеници не се сега дел од него, но тие најавуваат нови и ставање на епитет „модерен“ пред македонски јазик?
Претседателката Сиљановска-Давкова: Најпрво, како професорка не знам што значи модерен. Не постојат предмодерни, модерни, постмодерни нации и јазици. Сите нации настанале во втората половина на 18-от век и во 19-от век, па и нашата. Навистина бев изненадена од профилот, или од карактерот на поднесените амандмани, бидејќи да поднесувате амандмани врзани за идентитетските прашања, а тие се ад акта за разговор, бидејќи и договорот за ЕУ и Лисабонскиот договор и Повелбата за фундаментални права гарантираат почитување на националниот и на културниот идентитет, на јазичната различност, исто така. Значи за тие прашања не се разговара. Очекував, јас веќе кажав, да се случи она што се случи. Јас очекувам разбирање од нашите први соседи, навистина пријателски однос и мислам дека ќе дојде до тоа.
Прашање: Нема разбирање за средба меѓу двете делегации?
Претседателката Сиљановска-Давкова: Во ред, вие велите делегации, но јас имав пријатен, протоколарен, пријателски разговор со бугарскиот премиер вчера, пред вечерата.
Прашање: Што разговаравте?
Претседателката Сиљановска-Давкова: За нужноста од меѓусебно разбирање, без посредување, за потребата да се почитуваме, за потребата да го следиме духот на двата народa, за потребата да помагаме, за потребата оној кој е веќе внатре да му помогне на оној којшто оди кон Европската Унија. Јас ги бирам зборовите, верувам во потребата од пријателство. Верувам дека тоа ќе се случи и мислам дека тоа е нешто неминовно.
Ви благодарам.
