За време на посетата на Република Полска, претседателката Гордана Сиљановска-Давкова, оствари средба со припадници на македонската заедница што живеат таму.
Во Република Полска постои мала, но активна, угледна и добро интегрирана македонска дијаспора. Со големо задоволство во просториите на македонската амбасада во Варшава се сретнав со припадниците на нашата заедница, рече Сиљановска-Давкова.
Меѓу присутните беа доктори, професори, економисти, ИТ-инженери, бизнисмени, режисери, студенти и други професионалци кои со успех се реализираат во полското општество.
Во отворен и искрен разговор разменивме искуства за нивниот живот и работа во Полска, како и за можностите за уште посилно поврзување и соработка со татковината. Македонската дијаспора во Полска претставува жив мост меѓу двете пријателски држави. Тие го негуваат и го пренесуваат македонскиот дух, јазик, култура и традиции надвор од границите на нашата земја. Постојаниот и суштински контакт со дијаспората е од стратешко значење. Мојата поддршка за македонската заедница во Полска, како и за сите наши иселеници низ светот, е цврста и искрена, истакна претседателката по средбата.
