Претседателката Гордана Сиљановска-Давкова денеска на проштална средба го прими шефот на мисијата на ОБСЕ во Скопје, амбасадорот Килијан Вал.
Таа му изрази благодарност за неговиот личен ангажман, посветеност и придонес во јакнењето на капацитетите на националните институции преку реализација на бројни проекти и програми.
За неа, ОБСЕ имаше значајна улога во демократските реформи, а Стратегијата на Мисијата за периодот 2025–2027 година е добра основа за соодветно насочување на експертска помош.
Како клучни реформски приоритети ги издвои правосудството, институционалната независност, борбата против корупцијата и градењето јавна доверба во институциите, нагласувајќи ја важноста на владеењето на правото во реформскиот процес.
Таа го реафирмираше членството во Европската Унија како стратешка цел, истакнувајќи ја важноста на членството за градењето отпорност кон несаканите влијанија и притисоци од трети страни.
Сиљановска-Давкова повика на регионално разбирање, дијалог и соработка, како важна претпоставка за целосното интегрирање на регионот на Западен Балкан во ЕУ.
На крајот, претседателката му посака успех на амбасадорот Вал во неговиот иден професионален ангажман.
