Претседателката Гордана Сиљановска Давкова денеска го посети Генералштабот на Армијата и Министерството за одбрана.
За време на посетата, претседателката Сиљановска Давкова оствари средби со министерот за одбрана, Владо Мисајловски, со началникот на Генералштабот, генерал-потполковник, Васко Ѓурчиновски, како и со генералите во Армијата и раководни лица во Министерството.
На средбите, претседателката Сиљановска Давкова беше информирана за актуелната состојба, процесите на трансформација и модернизација и опремување, обуката и активностите кои се од значење за извршување на мисијата на Армијата, како и учеството во операциите со кои придонесуваме во колективната безбедност.
Претседателката Сиљановска Давкова истакна дека во Армијата како институција со најголема доверба во државата и докажан сојузник во Алијансата е неопходно понатамошно вложување за подобрување на условите за живот и работа во сите сместувачки капацитети. Таа изрази очекување дека Армијата, како и досега, ќе продолжи со истата посветеност да ја исполнува својата уставна должност да го штити територијалниот интегритет и независност, а армиските припадници да продолжат да бидат пример за професионализам, дисциплина и посветеност, како што доликува на земја членка на НАТО.
