Претседателката Гордана Сиљановска-Давкова на проштална средба го прими шеикот Јасим бин Хамад Ал-Тани, вршителот на должноста во амбасадата на Катар во Скопје, заблагодарувајќи му се за професионалниот и посветен однос во вршењето на дипломатската функција.
На средбата, покрај констатацијата за успешни пријателски политички односи, таа укажа на можноста за проширување на соработката во областа на образованието, науката, културата, здравството, земјоделството, туризмот, енергетиката и градежништвото, продлабочување на економските односи и раст на меѓудржавната трговска размена.
Исто така, Сиљановска-Давкова изрази интерес за приклучување кон проектот за извоз на природен гас од Катар во Албанија и Хрватска, со оглед на фактот дека се наоѓаме на оваа рута.
Таа ја нагласи клучната улога на Катар во стабилизирањето на немирниот регион, афирмирајќи се како докажан актер и фактор на мирот. Обајцата манифестираа цврста верба во силата на мирното решавање на споровите, безалтернативноста на мирот и потребата од траен мир како услов за развој.
Шеикот Јасим бин Хамад Ал-Тани, од личното дипломатско искуство во земјава, ја издвои беспрекорната соработка со неколку министерства: Министерството за одбрана, Министерството за внатрешни работи, Министерството за надворешни работи и надворешна трговија и Министерството за економија.
Соговорниците се согласија дека назначувањето амбасадори на двете земји, во пресрет на 30-годишнината од воспоставувањето на дипломатски односи идната година, ќе отвори нова фаза во соработката, далеку подобра од досегашната.
