Денеска, претседателката Гордана Сиљановска-Давкова, на маргините на „Акаба процесот Балкан III“, оствари средба со Претседателот на Република Бугарија, Румен Радев.
Таа, уште еднаш, нему и на бугарските граѓани им оддаде длабока благодарност за солидарноста изразена преку несебично пружената болничка нега на повредените во трагичниот пожар во Кочани, манифестирајќи искрено пријателство, соседска грижа и хуманост во еден од најтрагичните современи македонски настани.
Обајцата се согласија дека почестата комуникација на бугарските и македонските политичари, но и научници, ученици, студенти, професори, културни дејци, новинари и други категории субјекти ќе ја продлабочи и зацврсти меѓусебната доверба, ќе ги урне предрасудите и ќе има повеќекратен бенефит за граѓаните.
И покрај разликите во идентификувањето на можните излезни решенија за нашата евроинтеграциска блокада, заклучија дека ќе продолжат да дискутираат со добра намера, решени да го надминат проблемот.
