Претседателката Гордана Сиљановска Давкова го прими Есер Џевахир, македонски почесен конзул во Едрене, Република Турција.
На средбата се разговараше за унапредувањето на македонско-турските релации кои се развиваат преку различни видови на соработка во области од заемен интерес на двете држави.
Почесниот конзул Џевахир којшто е и заменик претседател на МАТТО – Стопанска комора на Македонија-Турција, ја информираше претседателката Сиљановска Давкова за неговите активности како почесен конзул насочени кон отворање на нови можности за соработка во повеќе области особено во економската област со цел динамизирање на соработката меѓу бизнис заедниците на двете земји.
Претседателката Сиљановска Давкова ја истакна својата посветеност за натамошно унапредување на севкупните билатерални односи при што посочи на потребата за создавање на потребните услови за продлабочување на економската соработка преку зголемување на трговската размена.
