Претседателот Стево Пендаровски денеска присуствуваше на отворениот час по изборниот предмет „Јазик и култура на Ромите“ во ОУ „Браќа Рамиз Хамид“ во Шуто Оризари по повод 5 ноември – Светскиот ден на ромскиот јазик.
Учениците и предметните наставници во рамки на отворениот час рецитираа поезија на ромски јазик, преку презентација ја прикажаа историјата на ромскиот јазик, а одиграа и кратка претстава.
Честитајќи го Светскиот ден на ромскиот јазик, претседателот Пендаровски ја поздрави заложбата на наставниците и сите чинители од ромската заедница, децата да следат настава на својот мајчин јазик од прво до деветто одделение по сите предмети. Тоа, како што потенцираше претседателот Пендаровски, потребно е да го овозможат државните институции што поскоро.
На отворениот час присуствуваа 20 ученици од седмо, осмо и деветто одделение, наставници кои предаваат предмети од јазичното подрачје и раководен кадар од ова основно училиште.
Во Република Северна Македонија ромската заедница која нема настава на својот мајчин јазик, до воведувањето на концептот за деветгодишно основно образование, мајчиниот јазик го изучуваше како факултативен предмет од прво до осмо одделение. Од 2008 година наваму, својот мајчин јазик Ромите го изучуваат преку изборниот предметот „Јазик и култура на Ромите“, од трето до деветто одделение.
