Претседателката Гордана Сиљановска-Давкова ги прими акредитивните писма на новоименуваниот амбасадор на Република Индија со седиште во Софија, Арун Кумар Саху.
На церемонијата амбасадорот истакна дека негова цел е билатералните односи да достигнат повисоко ниво, со посебен фокус на засилен политички ангажман, поцврсти трговски и инвестициски врски и развој на културната соработка.
Сиљановска-Давкова рече дека значајна димензија претставува економската соработка, бидејќи Индија нуди огромни можности за партнерство во информатичката технологија, обновливите извори на енергија, фармацевтската индустрија и во инфраструктурниот развој. Таа нагласи дека ние можеме да понудиме стратешка локација на Балканот, квалификувана работна сила и поволна деловна клима за индиските инвеститори и компании. Посебно внимание, според неа, заслужува соработката во областа на образованието и културата, додавајќи дека не поврзуваат и богатите културни традиции, заедничката посветеност на мирот, демократијата и владеењето на правото.
Обајцата се согласија дека двете земји ги спојува една посебна врска – светицата Мајка Тереза, родена во Скопје, а која својот живот го посветила на несебично помагање на најранливите во Индија. Оваа необична и исклучителна жена станува духовен мост на поврзување на двата народи, симбол на хуманоста и добрината, вредности коишто се почитуваат и негуваат во македонското и во индиското општество.
Посакувајќи му успешен амбасадорски мандат таа изрази очекување за реализирање на договорената официјална посета на претседателката на Индија, Друпади Мурму, на што амбасадорот рече дека тоа прашање е високо на неговата агенда.
