Me rastin e ceremonisë së ndërrimit të flamurit kombëtar, e cila mbahet çdo të premte të dytë të muajit, sot Kabineti i Presidentit u vizitua nga nxënës të Shkollës Fillore “Goce Dellçev” nga Vinica, fëmijë nga kopshtet e fëmijëve nga Shkupi – “Orce Nikolov” – Karposh, Akademia Britanike e Fëmijëve dhe “Izvorçe – Montessori”, si dhe disa nga mësuesit dhe edukatorët e tyre.
Ceremonia tradicionale u zhvillua nga Batalioni i Nderit i Armatës së Maqedonisë, i shoqëruar nga orkestra ushtarake.
Fëmijët e ndoqën ngjarjen me kuriozitet, duke iu bashkuar me respekt intonimit të himnit të Maqedonisë, ndërsa në fund e kurorëzuan momentin me një foto të përbashkët.
Ata shikuan me interes dhomat e Kabinetit të Presidentit dhe i kushtuan vëmendje të veçantë dy mozaikëve të bukur të Çemerskit në sallën ceremoniale.
Pjesa më emocionuese e vizitës ishte biseda e gjallë me presidenten, e cila u habit nga pyetjet inteligjente rreth lojërave dhe lëndëve të saj të preferuara shkollore, kafshëve shtëpiake, por edhe rreth vështirësive dhe sfidave të kryerjes së funksionit presidencial. Duke iu përgjigjur atyre, Presidentja Siljanovska Davkova pranoi sinqerisht se pyetjet e tyre e kthenin në periudhën më të bukur të jetës së saj, të cilën askush nuk e harron kurrë.
