Presidentja Gordana Siljanovska Davkova mbajti fjalim në Samitin e krerëve të shteteve dhe qeverive të pjesëmarrësve në Procesin e Bashkëpunimit të Evropës Juglindore (PBEJL), i cili mbahet sot në Shkup, si aktivitet final në kuadër të kryesimit maqedonas të Procesit, nën moton “Urëzimi i ndarjeve, ndërtimi i besimit.”
Në fjalimin e saj, Presidentja Siljanovska Davkova vlerësoi se në 28 vitet e fundit, Procesi u ndihmoi pjesëmarrësve të mbyllin disa çështje të hapura, të ndërtojnë besim të ndërsjellë dhe të bashkëpunojnë për arritjen e qëllimit të përbashkët, dhe ky është qëllimi që e gjithë Evropa Juglindore të fitojë një flamur të përbashkët – flamuri i Bashkimit Evropian.
Këto angazhime të përbashkëta, sipas presidentes Siljanovska Davkova, kanë dhënë rezultate konkrete – disa janë anëtarësuar me të drejta të plota, të tjerët kanë filluar negociatat për anëtarësim, ndërsa të tjerët janë kandidatë ose kanë paraqitur kërkesë për anëtarësim.
Sipas presidentes Siljanovska Davkova, edhe përkundër arritjeve të padiskutueshme të deritanishme, jemi dëshmitarë të një ngadalësimi të bashkëpunimit rajonal, veçanërisht në vitet e fundit, për shkak të stagnimit në integrimet evropiane, lidhjes së pamjaftueshme të infrastrukturës dhe energjisë, plakjes demografike dhe emigrimit masiv të të rinjve.
E gjithë kjo, tha presidentja, kulmoi me agresionin rus kundër Ukrainës, i cili është një kërcënim për paqen dhe stabilitetin, por edhe për sigurinë njerëzore dhe energjitike dhe sigurinë ushqimore.
