Presidentja Gordana Siljanovska-Davkova realizoi takim me Beate Meinl-Reisinger, Ministre Federale për Çështje Evropiane dhe Ndërkombëtare të Republikës së Austrisë, në të cilin u konfirmuan marrëdhëniet e shkëlqyera politike, të bazuara në respekt dhe mirëkuptim, si dhe u vu në dukje bashkëpunimi i zhvilluar dhe intensiv në telekomunikacion, bankari, kulturë, arsim dhe fusha të tjera.
Presidentja, duke vënë në dukje se në dy dekadat e fundit Austria ka qenë investitori më i madh i huaj, me mbi 50 kompani në vend, vuri në dukje potencialin për thellimin e bashkëpunimit ekonomik, veçanërisht në fushat e burimeve të energjisë së rinovueshme, infrastrukturës dhe arsimit.
Ministrja Beate Meinl-Reisinger e përmendi turizmin si një degë në zhvillimin e së cilës, përvoja e suksesshme e Austrisë mund të jetë një ndihmë e madhe.
Gordana Siljanovska-Davkova theksoi nevojën për t’i dhënë fund maratonës maqedonase drejt Brukselit, e kushtëzuar nga bilateralizimi i procesit të integrimit evropian dhe standardet e dyfishta për anëtarësim, ndonjëherë në kundërshtim me vlerat dhe parimet themelore të përcaktuara në dokumentet kushtetuese të BE-së.
Duke theksuar se Ballkani Perëndimor ishte dhe mbetet një përparësi e Qeverisë së re Austriake, ministrja Meinl-Reisinger vuri në dukje se pa rajonin e Ballkanit Perëndimor, Unioni nuk është i plotë. Duke e përmendur Austrinë si mbështetësen tonë të fuqishme, ajo konfirmoi se e ardhmja e Maqedonisë është në Bashkimin Evropian dhe se do të donte që bisedimet për zgjidhjen, por edhe gjetjen e vetë zgjidhjes, të këtij kontesti dypalësh të pabazuar të zhvilloheshin në Vjenë.
Duke shprehur mirënjohjen e saj të sinqertë për solidaritetin dhe ndihmën pas tragjedisë në Koçani, Siljanovska-Davkova tha se Austria edhe një herë dëshmoi se është miku dhe partneri ynë i sinqertë.
Të dyja ranë dakord se kishte ardhur koha për një vizitë të nivelit të lartë, qoftë në Shkup apo në Vjenë.
