Presidentja Gordana Siljanovska Davkova mori pjesë sot në mbylljen e “Kampit të gjashtë të Ohrit për ekselencë të lartë teknologjike”, i cili mbahet nën patronazhin e saj dhe organizohet nga “Maqedonia 2025”.
Ajo vlerësoi se iniciativa të tilla jo vetëm që kontribuojnë në përvetësimin e njohurive dhe aftësive të avancuara në fushën e robotikës, programimit, inxhinierisë dhe inovacioneve, por edhe i përgatisin të rinjtë të bëhen aktorë aktivë në formësimin e së ardhmes, në vend të vëzhguesve pasivë të ndryshimeve.
Sipas saj, është veçanërisht e rëndësishme që të rinjtë të mendojnë në mënyrë kritike, të krijojnë zgjidhje inovative dhe të përdorin teknologjitë moderne si mjet për përparim shoqëror, zhvillim të qëndrueshëm dhe cilësi më të mirë të jetesës.
Presidentja Siljanovska Davkova tha se talenti duhet të njihet, të ushqehet, të stimulohet dhe të shpërblehet, ndërsa të rinjtë duhet t’i “infektojnë” të tjerët përreth tyre me dashurinë për dijen dhe shkencën.
Duke kujtuar robotin Proteus, i cili u kthye kundër krijuesit të tij, ajo theksoi se njerëzimi duhet të sillet me mençuri ndaj teknologjive të reja, sepse ato duhet të mbeten në shërbim të njeriut dhe jo të bëhen shkak për humbjen e dimensionit njerëzor.
Pjesëmarrësit ndanë përvojat e tyre nga kampi, duke theksuar se programi u mundësoi atyre të fitojnë njohuri dhe aftësi të reja, të punojnë në projekte inovative dhe të krijojnë miqësi me bashkëmoshatarë nga vende të ndryshme.
Ata prezantuan projektet e zhvilluara gjatë kampit, pas së cilës Presidentja Siljanovska Davkova, në cilësinë e saj si patrone, u ndau atyre çertifikata për përfundimin e programit me sukses.
Këtë vit, kampi në fjalë mblodhi së bashku 24 të rinj të moshës 11 deri 15 vjeçe nga diaspora maqedonase në SHBA, Maltë, Serbi, Emiratet e Bashkuara Arabe, Gjermani dhe nga disa qytete të vendit.
