Presidentja Gordana Siljanovska Davkova u takua me përfaqësues të komunitetit vlleh, të udhëhequr nga Sterjo Papulli, president i Komitetit Organizativ për festimin e Ditës Kombëtare të Vllehëve.
Me rastin e festës, Presidentja Siljanovska Davkova u dërgoi urime anëtarëve të komunitetit vlleh dhe theksoi se vllehët, si një komunitet indigjen, janë pjesë e pandashme e zhvillimit historik, kulturor dhe shoqëror të shtetit maqedonas.
Ajo theksoi se kontributi i tyre gjatë periudhave të ndryshme historike, nga Kryengritja e Ilindenit dhe Republika e Krushevës, deri te lufta antifashiste, përfshin një vend të veçantë në traditën e shtetndërtimit maqedonas. Sipas saj, komuniteti vlleh ende kontribuon në mënyrë të rëndësishme në fushën e kulturës, arsimit, shkencës dhe ekonomisë.
Presidentja Siljanovska Davkova theksoi se shumë intelektualë dhe artistë me origjinë vllehe kanë lënë gjurmë në hapësirën kulturore maqedonase, por edhe në hapësirën më të gjerë ballkanike dhe europiane.
Komuniteti vlleh vë në dukje sfidat që lidhen me ruajtjen e gjuhës vllehe dhe trashëgimisë kulturore për shkak të kërcënimeve në rritje të zhdukjes graduale të gjuhëve të popujve të vegjël.
Sipas tyre, nevojiten përpjekje shtesë për të përmirësuar mësimdhënien e gjuhës vllehe, interes më të madh tek të rinjtë për të mësuar gjuhën e tyre amtare, si dhe një prani më të madhe digjitale dhe mediatike të gjuhës vllehe.
Ata iu referuan Rekomandimit 1333 të Këshillit të Europës për promovimin e të drejtave të vllehëve. Sipas tyre, është arritur përparim i konsiderueshëm, por ende nevojitet mbështetje për të ruajtur gjuhën dhe identitetin vlleh.
Bashkëbiseduesit e informuan Presidenten Siljanovska Davkova për iniciativën e themelimit të një Institucioni Kombëtar “Qendra për Kulturën e Komunitetit Vlleh”, si një institucion që do të kontribuonte në ruajtjen e traditës vllehe, zhvillimin e arsimit dhe promovimin e dialogut ndërkulturor.
Presidentja Siljanovska Davkova ka shprejur mbështetje mbi përpjekjet e komunitetit vlleh, duke vlerësuar se diversiteti kulturor paraqet vlerë thelbësore e shoqërisë maqedonase dhe themel i rëndësishëm i karakterit demokratik dhe multikulturor të shtetit.
