Në takimin e Presidentes Gordana Siljanovska Davkova dhe Kryetares së Kuvendit të Republikës së Sllovenisë, Urshka Kllakoçar Zupançiç, e cila ndodhet për vizitë zyrtare në vend, u theksuan përkushtimet për nxitjen e unitetit rajonal, ruajtjen e bashkëpunimit të mirë ekonomik dhe mbështetjen e fuqishme për evrointegrimet maqedonase.
Sllovenia ka qenë, është dhe do të mbetet mbështetësja dhe mikja jonë në rrugën drejt BE-së, sepse aty e kemi vendin, theksoi Presidentja Siljanovska Davkova.
Presidentja shprehu mirënjohjen e sinqertë dhe të thellë për simpatinë, ndihmën dhe mbështetjen që na e dha Sllovenia pas ngjarjes tragjike në Koçan, e cila dëshmon për miqësinë e fortë.
Ajo e falënderoi për mbështetjen e vazhdueshme në procesin e maratonës sonë të integrimeve evropiane dhe theksoi se Sllovenia ishte gjithmonë pranë nesh.
Duke e theksuar qëndrimin e saj për domosdoshmërinë e respektimit të Kritereve të Kopenhagës, ajo shprehu skepticizëm në lidhje me respektimin e dokumenteve kushtetuese të BE-së.
Të dyja e shprehën kënaqësinë për bashkëpunimin dhe partneritetin bilateral në nivel shumëpalësh, i cili ndër të tjera bazohet në aleancën e NATO-s, angazhimet e përbashkëta për paqen dhe stabilitetin në rajon, si dhe faktin se nuk ka asnjë çështje të hapur midis dy vendeve.
Kryetarja e Kuvendit të Sllovenisë e rikonfirmoi mbështetjen e saj, duke theksuar se BE-ja është e paplotë dhe e papërfunduar pa të gjithë popujt evropianë. Ajo shprehu mirëkuptim për zhgënjimin e qytetarëve maqedonas për shkak të stërzgjatjes së procesit evrointergrues dhe për frikën e vendosjes së pengesave të reja edhe përkrah lëshimeve të shumta të bëra nga pala maqedonase.
Bashkëbiseduesit ranë dakord se politika e zgjerimit të BE-së nuk duhet të jetë e dyanshme dhe nuk duhet të ketë kritere dhe precedentë të veçantë për ne, pasi kjo do të ndikojë edhe te kandidatët e ardhshëm.
