Претседателката Гордана Сиљановска-Давкова го прими директорот на Националната установа „Охридско лето“, Ѓорѓи Цуцковски.
Упатувајќи честитки до Цуцковски по повод неговиот избор за директор на овој реномиран меѓународен фестивал, таа изрази уверување дека со богатата музичка кариера и како првенец на Националната опера и балет ќе придонесе за унапредување на уметничко-естетските вредности и критериуми на „Охридско лето“.
Како традиционален покровител на оваа најстара музичко-сценска манифестација во земјава, претседателката Сиљановска-Давкова беше запознаена со подготовките и новитетите на претстојното 65. издание на „Охридско лето“, на коешто се очекува врвна уметничка програма со свежи, модерни и креативни содржини.
Таа укажа дека „Охридско лето“ со својот меѓународен карактер е додадена вредност на културната дипломатија и истакна дека и во иднина ќе продолжи да ги поддржува манифестациите, коишто преку промоција на културните и уметничките вредности ги зближуваат народите и ja јакнеат меѓусебната почит.
Соговорниците разменија мислења и за можностите и начините за натамошен развој на фестивалот, со цел остварување на уште повисоки дострели на меѓународната културна сцена и севкупно промовирање на земјава.
„Охридско лето“ претставува еден од најзначајните настани којшто со својата долгогодишна традиција, препознатливост, квалитет и углед ѝ ги доближува светските имиња на македонската публика, а истовремено придонесува за поквалитетна туристичка понуда на нашиот духовен и културен центар, Охрид.
