Прашање: Дали планирате средба со бугарскиот премиер во Хаг?
Претседателката Сиљановска-Давкова: Не можам да ви одговорам дали планирам, бидејќи јас за евентуална средба разговарав со господинот Антонио Кошта. Негов беше предлогот. А во меѓувреме јас не знам. Јас ќе бидам таму, ако ми е мене редот. Инаку се знае, ред е да разговарате со хомологот. Но еве, нема проблем. Меѓутоа, не зависи од мене. Значи, зависи од, не сакам да го употребам изразот, јас нерадо употребувам другата страна – од нашите соседи. Се разбира, ние сме толку блиску што би можеле да разговараме и во близина некаде, ама предлогот дојде од господинот Антонио Кошта. И тој сега, кога бев јас во Ница, ме информираше дека нема да дојде господинот Радев на самитот на НАТО, туку ќе дојде премиерот. Ете, тоа е тоа.
Прашање: За евентуална средба со Жељазков, дали е потврдено?
Претседателката Сиљановска-Давкова: Не, не, не, не. Видете, не сме предложиле ние на господинот Жељазков за да биде потврдено. Туку, веројатно, тоа е нешто што ако е предложено од европска страна, значи од претседателот на Европскиот Совет, тогаш оттаму треба да дојде. Инаку јас сум спремна за разговор. Со господинот Радев неколкупати сме се виделе, тој ги знае моите ставови, нашите пардон, национални ставови. Ги знае и господинот Антонио Кошта, ги знаат и останатите. Значи, јас секогаш велам дека може да дојде време, да дојде до израз европската креативност, која многупати сме ја, или напати сме ја виделе, еве и во овој случај. Заради доброто на регионот и заради, можеби, најважниот процес во моментов европски – процесот на проширување.
