Новинарско прашање: Колку е значајно отворањето на вакви центри за самата општина и дали може да очекуваме низ целата држава да се прошири оваа иницијатива?
Претседателката Сиљановска-Давкова: Особено сум среќна, бидејќи идејата ми беше одамна позната. Навистина „Во мојот свет“ да се влезе, значи да се признае дека тој е и наш заеднички свет. Благодарност до здружението, благодарност до градоначалникот, кој наместо со згради, реши овој простор на некогашната општина да остане место каде што ќе доаѓаат сите, место каде што децата со аутизм, ќе градат заеднички свет со сите други. Очекувам да биде инспирација. Изразувам посебна благодарност до бугарската амбасада и до бугарската држава за помошта, којшто не е прва, туку една од многуте. И денеска чувме од амбасадорот подготвеност за понатамошна поддршка на слични проекти. Исто така, изразувам посебна благодарност до фондацијата „Механџиски“ за нејзината континуирана хумана поддршка. Восхитена сум од персоналот и од нивниот ентузијазам. Ова е убав простор и посакувам да се формира мрежа на слични.
Новинарско прашање: Во изминатите денови во медиумите имаше наводи за наводна шпиунска афера во вашиот Кабинет. ОЈО вчера потврди дека отвориле предистражна постапка. Вашиот коментар?
Претседателката Сиљановска-Давкова: Прво квалификацијата, шпиунска афера и слично, не сакам да ја коментирам. Второ, кога зборуваме за предистражна постапка, јас нема да ги заборавам зборовите на мојот професор Никола Матовски, професор по кривична постапка, тој велеше дека во предистражната постапка малку се зборува, многу се работи, односно се собираат информации. Јас никогаш не ги толкувам постапките на другите органи, ја почитувам поделбата на власта, но не можам, а да не кажам дека малку сум збунета со одговорите на новинарските прашања, или со објавите кои доаѓаат токму од Обвинителството за организиран криминал, во коишто се објаснува нивната комуникација со Министерството за внатрешни работи. Не, не бегам од изјави, меѓутоа мислам дека треба да се почитуваат одредбите од законот за кривична постапка и во поглед на презумпцијата на невиност, но како што реков и во поглед на собирање на податоци и евентуално отворање на кривична постапка.
Новинарско прашање: Како ја коментирате изјавата на Венко Филипче дека сте паднале на испитот во Словенија, дека со вашите ставови изнесени таму ја слабеете нашата позиција во евроинтеграциите?
Претседателката Сиљановска-Давкова: Не знам дали да коментирам такви изјави. Никогаш не сум паднала на испит, ни на факултет, а во Словенија докторскиот испит сум го положила со одлика, значи со највисок успех. Пред мене беа сите членови на мојата докторска комисија, иако се тоа луѓе со многу години, моите колеги исто така, амбасадори, јас говорев на научен јазик, говорев за уставниот инженеринг, којшто не е нов феномен, којшто е стар феномен, меѓутоа студијата на случај се разбира беше мојата земја. Никогаш и никаде јас не сум ја претставила државата на начин каков што не доликува. Секогаш сум ги бранeла националните интереси, преку политика заснована на докази, никаде не се чувствувам инфериорно. Она што го посакувам е да бидеме третирани како сите други држави, и она на што потсетувам е мојата страст – Уставното право. Европската Унија нема кодифициран устав, но има уставни документи. Јас сум предавала и Европско уставно право, и се разбира, дека повикувам на основните принципи и вредности, коишто се толку важни за Европската Унија, што за нив има и судска заштита.
