Претседателката Гордана Сиљановска Давкова денеска во Скопје се обрати на конференцијата што се одржа по повод 20 години од постоењето на Центарот за истражување и креирање политики.
Во обраќањето, претседателката Сиљановска Давкова нагласи дека ѝ е чест што го држи говорот на оваа конференција, особено затоа што е свесна дека само добрите јавни политики креираат јавна вредност и додаде дека имаме сериозен проблем со креирањето јавни вредности, посочувајќи дека затоа има иднина и поле за работа на Центарот за истражување и креирање политики.
Таа оцени дека научната методологија по стапките што ги промовира ЦИКП се оние во духот на најдобрите европски практики и ги охрабри и увери дека идеите што ги промовираат се импресивни и дека тие се компетитивни.
Посочувајќи дека овој тинк-тенк беше добредојден кај сите политички партии, од сите пратеници, претседателката Сиљановска Давкова нагласи дека помогна во градењето консензус кој многу тешко се гради со такви остри поделби во Собранието, во едно поделено општество како нашето и порача дека треба да продолжат да се држат до доказите, да градат консензус врз основа на докази, врз основа на аргументи зошто сама така се заслужува почит.
„И јас ќе се држам до духот на консензусот без кој не може да живее ни да преживее ниту еден претседател, консензус меѓу политичките партии, консензус без разлика на верските и етничките разлики, консензус без разлика на полот и родот, консензус без разлика на возраста зошто само така ќе чекориме кон владеење на правото, а без владеење на правото не може да постои Европската Унија“, рече претседателката Сиљановска Давкова.
Претседателката рече дека Балканот и народите на Балканот имаат потреба од јасна иднина и затоа треба европска стратегија и притоа порача дека е крајно време да препознаеме јасна европска стратегија бидејќи премногу чекавме.
„Мораме да најдеме регионални решенија, мораме од Балканот да направиме пристојно место за живеење, јас дури понекогаш велам досадно. Мислам дека и оние во ЕУ треба да ни помогнат на заедничкиот пат кој не е пат кон Брисел, туку е препознавање на европските вредности, принципи, институции овде на Балканот“, порача претседателката Гордана Сиљановска Давкова во обраќањето на конференцијата што се одржа по повод 20 години од постоењето на Центарот за истражување и креирање политики.
