Претседателката Гордана Сиљановска-Давкова денеска на проштална средба го прими амбасадорот на Република Казахстан, Сатибалди Буршаков.
Во разговорот беше оценето дека односите меѓу двете земји во изминатиот период добија нова динамика, со активен политички дијалог и размена на посети на високо ниво. Претседателката се осврна на нејзината работна посета на Астана во мај 2025 година, учеството на Меѓународниот Астана форум и средбата со претседателот на Казахстан, Касим-Жомарт Токаев.
Сиљановска-Давкова му се заблагодари на амбасадорот за ангажманот и придонесот во унапредувањето на македонско-казахстанските односи, потенцирајќи дека неговиот мандат ќе биде запаметен по исклучителната посветеност на амбасадорската дипломатска мисија и работа.
Претседателката изрази интерес за нови казахстански инвестиции во земјава и заеднички проекти.
Амбасадорот Буршаков детално ја информираше за политичките промени во Казахстан, по стапувањето во сила на новиот Устав, со којшто се укина дводомниот и се воведе еднодомен парламент, во чиј состав од 145 пратеници беше избран и амбасадорот Буршаков.
Сиљановска-Давкова му посака успешен парламентарен мандат и плодна меѓупарламентарна активност.
