Денеска во посета на Кабинетот на Претседателот престојуваа студенти од прва, втора, трета и четврта година на Правниот факултет „Јустинијан Први“, при Универзитетот „Св. Кирил и Методиј“ во Скопје.
За време на посетата, студентите имаа можност да се запознаат со историјатот на објектот каде што е сместен Кабинетот на Претседателот и со неговата денешна намена и употреба, како и начинот на функционирање на институцијата. Посетителите ги разгледаа просториите во коишто се приредуваат свечености, се одржуваат прес-конференции и се реализираат официјалните и работните средби на Претседателот, а престојуваа и во Мозаик салата со импозантниот диптих „Македонија – светла земја“ и „Македонија – земјата памети“ изработен од реномираниот уметник, академик Глигор Чемерски.
Во рамки на посетата на претседателскиот Кабинет, студентите се запознаа со претседателот Пендаровски и со него поразговараа за претседателската функција и уставните надлежности, за неговите активности и како и за општествено-политичките прашања во земјата и актуелните теми што ги засегаат младите.
