Во рамки на официјалната посета на албанскиот претседател, денеска беше одржана заедничка прес-конференција на претседателката Гордана Сиљановска-Давкова и претседателот Бајрам Бегај.
Во продолжение е интегралната изјава на претседателката Сиљановска-Давкова.
Благодарам за присуството.
Ќе го повторам она што му го кажав на господинот Бегај и она што го кажав на заедничката средба на албанската делегација и на претставниците од мојот кабинет. Секогаш се радувам на средбите со господинот Бегај. Иако неговата вокација е лекар, а мојата правник, двајцата сме професори и најчесто разговараме за нештата што се важни за светот, за принципите и вредностите, бидејќи тоа се филозофски прашања.
Значи, чест ми беше и задоволство да му посакам добредојде на претседателот Бајрам Бегај. Посетава е уште една потврда за одличните пријателски односи, а одлични пријателски односи се градат само и само врз меѓусебна почит, доверба, партнерство и заедничка визија за европската иднина, ама и за светот.
Речиси немаше прашање за кое не разменивме ставови, се разбира нашиот политички дијалог е дијалог заснован на отвореност и разбирање. Секогаш има меѓу соседите прашања кои заслужуваат посебно внимание, но едно е јасно, ние немаме отворени прашања. Кога немате отворени прашања, имате основ за соработка во сите области.
Иако статусот на албанскиот претседател и мојот е воглавно церемонијален и ние немаме надлежност во економијата, се разбира, бидејќи ги претставуваме граѓаните и дома и надвор и водиме сметка за прогресот на двете држави, уште еднаш денеска и покрај напредокот потенциравме дека има простор за зголемување на трговската размена и за инвестициите. Има неискористен материјал меѓу бизнис заедниците, треба да се валоризира. Потребна е понатамошна инфраструктурна заедничка активност и поврзаност. Треба да ги олесниме процедурите за прекугранична соработка, тука како што знаете добар пример се соработката на царинските управи на двете држави, кои наоѓаат решение за непречено одвивање на транспортот заради блокадата на граничниот премин Ќафасан со пренасочување преку Блато.
Меѓу главните теми, се знае, секогаш е темата врзана за европската перспектива, таа е поблиска за Албанија. Јас при секоја средба изразувам задоволство во чекорењето на Црна Гора и Албанија, гледам европски чекори и за целиот Западен Балкан. Се разбира дека цврсто сме определени за членство во Европската Унија. До членството се стигнува со реформи, особено со владеење на правото, борба против корупцијата и јакнење на демократските институции. И тука имаме консензус дека тоа е нешто што не е врзано само за Копенхагенските критериуми, туку за нашата европеизација. Што сакам исто така да истакнам, дека уште еднаш повторив, билатерализацијата на евроинтеграцијата нема да биде осамен пример и дека сериозно треба да се однесуваат членовите на Европската Унија кон неа, да ја превенираат, дека ставањето на агендата на идентитетските прашања и на историските прашања само ќе го комплицира процесот на пристапување на земјите коишто природно, географски, историски и културно припаѓаат кон ЕУ, но сè уште не се политички членки на ЕУ. Двајцата веруваме дека нема поголема инвестиција во стабилноста на Западниот Балкан од членството во ЕУ.
Јасно ни е дека во моментов она што е најважно во овој свет на неизвесност е обостраната приврзаност на европската меѓународна и безбедносна политика, тоа нè прави отпорни на притисоци и на влијанија. Во рамките на НАТО имаме извонредна соработка. Сметаме дека со оглед на непредвидливите глобални предизвици, партнерството внатре во НАТО е важно. Секогаш сме давале и ќе продолжиме да даваме заеднички придонес во заштитата на мирот, не само регионалниот, туку и пошироко.
Овојпат или во посетата е вклучен и ректорот на албанскиот универзитет и тоа е еден одличен потег, значи рака за соработка во образованието, во науката. Ние сме уверени дека поврзувањето на академските институции, но и на културните установи, ќе придонесе за многу подлабоко меѓусебно разбирање и за долгорочно пријателство меѓу двата народи. Се разбира, важен мост во соработката е македонското национално малцинство во Република Албанија, но за господинот Бегај, исто така, и статусот на Албанците кај нас. Се разбира, двете држави во духот на Рамковната конвенција за заштита на правата на малцинствата, во духот на другите акти што се однесуваат на заштитата, секогаш се отворени за соработка.
Сакам на крајот само една реченица да кажам, пред сите вас да му се заблагодарам за посетата на господинот Бегај, да изјавам дека денешнава средба за мене е поттик за поинтензивна билатерална соработка, дека таа е уште еден влог во продлабочувањето на пријателството и на заемната поддршка.
Благодарам.
