Претседателката Гордана Сиљановска-Давкова денеска имаше проштална средба со амбасадорот на Република Чешка, Јарослав Лудва.
Таа му се заблагодари за професионалното и посветено вршење на дипломатската должност, оценувајќи дека дал особен придонес во зацврстувањето на македонско-чешкото пријателство.
Според претседателката, континуираната чешка поддршка на македонската евроинтеграција ја потврдува принципиелната определба на Прага за проширување на Европската Унија. „Чешката Република има значајна улога во овој процес, не само како членка на Вишеградската група, туку и како дел од групата, „Пријатели на проширувањето”“ – смета таа.
Обајцата се согласија дека сојузништвото во рамките на НАТО е гаранција за зачувување на мирот, безбедноста и стабилноста.
Амбасадорот Лудва истакна дека од Скопје заминува со најубави спомени, нагласувајќи дека во текот на дипломатскиот мандат воспоставил плодна и блиска соработка со македонските институции и граѓани.
Сиљановска-Давкова високо ја вреднуваше брзата и хумана реакција на Чешка, за време на огнената стихија во Кочани, и помошта на специјализираниот медицински тим од Воената универзитетска болница во Прага во лекувањето на повредените во трагедијата.
На крајот, таа му посака добро здравје и успех во кариерата, со уверување дека Скопје секогаш ќе биде негов втор дом.
