Претседателката Гордана Сиљановска Давкова денеска го прими во проштална средба амбасадорот на Канада, Џајлс Норман.
На средбата претседателката изрази благодарност за севкупниот личен ангажман и придонес на амбасадорот Норман во унапредување на односите и соработката меѓу двете земји и му посака понатамошен личен и професионален успех.
Во разговорот беше изразено задоволство од одличните македонско-канадски односи и беше нагласен интересот за натамошно зајакнување и динамизирање на политичкиот дијалог преку размена на посети на сите нивоа, како и за интензивирање на севкупната соработка меѓу двете пријателски држави, особено во доменот на економијата.
Посочувајќи дека Декларацијата за соработка и стратешко партнерство претставува солидна основа за понатамошен развој на соработката меѓу двете земји, претседателката ја реафирмираше нашата посветеност за зачувување на меѓународниот поредок, промовирање на демократијата, граѓанското општество и човековите права, во интерес на безбедноста и економскиот просперитет на државата.
Во разговорот, претседателката изрази благодарност за силното и функционално партнерство меѓу двете земји во рамки на НАТО Алијансата, како и за континуираната поддршка од Канада на политичките, економските и безбедносните реформи на патот кон полноправно членство во Европската Унија.
Соговорниците ја поздравија соработката на мултилатерален план, особено во рамките на Обединетите Нации, како и во Меѓународната организација за Франкофонија, како и значајната улога на многубројната и добро организирана македонска дијаспора во Канада во јакнење на севкупните врски меѓу двете земји.
