Претседателката Гордана Сиљановска Давкова денеска во проштална средба го прими амбасадорот на Народна Република Кина, Џанг Ѕуо.
На средбата беше констатирано дека односите меѓу двете земји се на исклучително високо ниво и беше искажано задоволство од континуираните напори за интензивирање на соработката во сите области од заемен интерес.
Претседателката Сиљановска Давкова изрази уверување, дека во интерес на двата народи, македонско-кинеското пријателство ќе продолжи да се развива во духот на меѓусебното разбирање и почит.
Во таа насока, беше истакнато очекување дека во периодот што следи, со заеднички ангажман, ќе бидат искористени потенцијалите за продлабочување на соработката во доменот на економијата, трговската размена, туризмот и ќе бидат отворени нови можности за зголемување на инвестициите во инфраструктурни проекти.
Во контекст на актуелните геополитички и геостратегиски состојби, соговорниците разменија мислење за надворешно-политичките приоритети на двете земји, улогата, позицијата и влијанието на Кина на меѓународен план, како и во нашиот регион.
Претседателката Сиљановска Давкова му се заблагодари на амбасадорот Ѕуо за неговиот севкупен ангажман, поддршка и придонес во јакнење на билатералните односи и му посака успех во натамошната работа.
