Претседателот Стево Пендаровски денеска во Крушево се обрати на настан по повод одбележувањето на Меѓународниот ден на жената од руралната средина.
Настанот е во организација на Националната федерација на фармери со поддршка на шведската развојна организација „We Effect“ и Германското друштво за меѓународна соработка – GIZ, со цел подигнување на свеста за важноста и улогата на жените од руралните средини и унапредување на нивната економска и социјална положба во општеството.
Во продолжение е интегралното обраќање на претседателот Пендаровски.
Почитувани сограѓанки од руралните средини,
Почитувани членови на Националната федерација на фармери,
Почитувани претставници на државните институции и локалната самоуправа,
Почитувани претставници на дипломатскиот кор,
Почитувани гости,
Ви благодарам на честа да бидам дел од настанот посветен на одбележување на 15-ти октомври – Меѓународниот ден на жената од руралната средина. Денеска, токму со одбележувањето на овој значаен датум и преку овој настан, придонесуваме за подигање на свеста за значењето на придонесот на руралната жена во локалните заедници, но и во општеството во целина. За жал, мораме да признаеме дека во реалноста сеуште сме далеку од постигнувањето на целосна рамноправност на руралната жена на било кое ниво во државата.
Несомнено, ни претстои голема работа за да овозможиме економска самостојност и социјална интеграција на руралната жена. При тоа, неопходен услов е поддршката на женското лидерство и на организациите кои се занимаваат со оваа проблематика.
Гласот на руралната жена, нејзините потреби и проблемите со кои се соочува, треба да бидат чуени, но, и решени. Поддршката на оваа категорија жени не смее да биде декларативна и наменска, како што најчесто е, и не само на меѓународниот ден, туку суштинска и секојдневна. Затоа е потребен ангажман на сите засегнати страни и функционално партнерство меѓу државните институции и граѓанските организации заради вклучување на руралните жени во процесот на одлучување на сите нивоа, со што и самите ќе станат креатори на политиките и иницијативите за подобрување на нивната положба. Едноставно, со други зборови кажано, тие самите треба да одлучуваат за себе и за својата улога во општеството.
Секако, клучно е надминувањето на стереотипите и на традиционалното вреднување за местото и за улогата на жената во заедницата и во општеството, што е најизразено токму во руралните средини. Во овој контекст особено релевантни се темите за обезбедување на платено породилно отсуство и здравствено осигурување на жените земјоделки.
Почитувани,
Руралните жени се столб на локалната економија, придонесувајќи како земјоделки, сезонски работнички и како претприемачки. Со својот ангажман, тие, пред се, придонесуваат за одржување на семејството, односно, обезбедување на храна и намирници за домаќинството, но, и за производство кое го пласираат на пазарите. Покрај оваа работа, тука е и нивната секојдневна грижа за семејството и најголемиот товар околу подигнувањето и воспитувањето на децата. Накратко кажано, руралните жени сe пример за посветеност, солидарност и грижа за другите.
Затоа тие заслужуваат да добијат безрезервна поддршка и помош од секој од нас, во рамки на нашите надлежности. Секако еден од начините за подобрување на состојбите е вмрежувањето и користењето на искуствата од другите земји. Затоа, го поздравувам создавањето на регионална платформа за заедничко дејство за подобрување на економската и социјалната состојба на руралните жени. Ги поздравувам и упатувам благодарност за присуството на денешниот настан на организациите коишто доаѓаат од земјите на Западниот Балкан и кои учествуваат, кои се дел од оваа регионална платформа.
Би сакал моево обраќање да го завршам посакувајќи успех на регионалната платформа и воопшто на сите организации и активисти во напорите за поддршка на руралните жени и за подобрување на нивната социо-економска положба во општеството.
Ви благодарам.
