Претседателот Стево Пендаровски денеска прими членови на Надзорниот и на Управниот одбор на банкарската групација Штаермаркише Шпаркасе (Steiermärkische Sparkasse), како и претседателот на Управниот одбор на Шпаркасе Банка АД Скопје.
На средбата, претставниците на групацијата го информираа претседателот Пендаровски дека во Северна Македонија, Шпаркасе Банка работи од 2008-ма година. Тие, истовремено, изразија подготвеност да останат посветени на земјата и на регионот имајќи предвид дека групацијата има отворено свои претставништва и во 5 други земји во регионот.
Заблагодарувајќи се за посетата на земјава, претседателот Пендаровски истакна дека односот на Австрија и Северна Македонија се заснова на меѓусебна почит и доверба. Австрија, како што потенцираше претседателот Пендаровски, во континуитет дава силна поддршка за влез на Северна Македонија во Европската Унија.
