Претседателката Гордана Сиљановска Давкова денеска ја прими претставничката на УНИЦЕФ, Лесли Милер.
На средбата се разговараше за соработката на УНИЦЕФ со релевантните институции во нашата држава во повеќе области значајни за обликувањето на иднината на децата.
Претседателката Сиљановска Давкова упати благодарност за трајното партнерство меѓу УНИЦЕФ и нашата држава кое се одвива повеќе од 30 години и кое резултира со трансформативни промени во животот на децата, поттикнувајќи ги нивните права и подобрување на нивната благосостојба особено во здравството, образованието, социјалната заштита и правдата.
На средбата Претседателката нагласи дека насоките на УНИЦЕФ играат клучна улога во справувањето со современите предизвици, особено со ефектите од климатските и еколошките промени врз децата, во контекст на стремежот кон поодржлив социо-економски напредок.
Претседателката Сиљановска Давкова ја реафирмираше својата посветеност да се овозможи секое дете во нашето општество да има еднакви можности да напредува обезбедувајќи им достапност до образование, здравство и заштита.
