Војните, тероризмот, социо-економската и финансиската нестабилност ги загрозуваат човековите права и слободи, предизвикувајќи хуманитарни катастрофи. Милиони луѓе ширум светот се приморани да ги напуштат своите домови за да преживеат и во потрага по безбедност, подобар живот за нив, нивните семејства и заедници.
Нашата држава е потписничка на Конвенцијата од 1951 година и преку својата долгогодишна соработка со УНХЦР покажа солидарност со бегалците од многу конфликти во поновата историја. Од почетокот на војната во Украина прифативме бегалци при што на децата бегалци им се овозможува соодветна интеграција во образовниот систем, како и соодветна здравствена и социјална помош за ранливите категории, за лицата со попреченост, како и за студентите и новинарите.
Светскиот ден на бегалците нè потсетува дека тие имаат потреба да бидат заштитени, да ја имаат нашата поддршка и солидарност за да ги обноват своите животи. Во таа насока, би сакал да ја реафирмирам нашата цврста определба како држава да ги исполниме обврските од Глобалниот договор за бегалците, подготвен под покровителство на Обединетите нации, а кој обезбедува рамка за подобрување на светскиот одговор на потребите на бегалците. Добрата координација и соработката меѓу државите, заедничката одговорност и покажана хуманост, можат многу да помогнат во решавање на проблемот со бегалците. Северна Македонија, како и во сите досегашни кризи безрезервно ќе помага и ќе биде кредибилен и одговорен партнер.
