Претседателот Стево Пендаровски присуствуваше на настанот „Ацо Шопов – Невообичаено“ којшто се одржа во рамки на чествувањето на 100-годишнината од раѓањето на македонскиот поет Ацо Шопов, иницијатива под покровителство на Претседателот.
Настанот е во организација на Фондацијата „Ацо Шопов – Поезија“ и на истиот беа промовирани три книги: „Од онаа страна на Небиднината – Разговори со Светлана Шопова за Ацо Шопов“ од Иван Антоновски, „Ацо Шопов: Песна над песните – Избор од поезијата, размислите, критиките и архивскиот материјал“ од Јасмина Шопова и „Небиднина – графички омнибус“, од Жарко Иванов, Иван Ивановски, Владимир Лукаш и Крсте Господиновски.
На настанот беа прикажани четири анимирани филмови инспирирани од четири песни на Ацо Шопов подготвени од продукцијата Флипбук, а дел од настанот беа и изложбите посветени на неговиот творечкиот опус „Патот по кој чекорам“ која беше поставена претходно во седиштето на УНЕСКО во Париз и „Величенствен поетски мост што ги поврзува сите континенти“ којашто беше дел од содржините на годинешните Струшки вечери на поезијата.
Чествувањето на големиот јубилеј – 100 години од раѓањето на македонскиот поет Ацо Шопов е во соработка со УНЕСКО којашто се вклучи во одбележувањето на јубилејот. По повод Светскиот ден на поезијата – 21 март, во седиштето на УНЕСКО во Париз се одржа меѓународен симпозиум во негова чест, поетски перформанс и изложба.
Во рамки на програмата за чествување на стогодишнината од раѓањето на Ацо Шопов одржани се бројни културно-образовни содржини во текот на целата година: мултимедијална уметничка изложба, омаж на Шопов во рамки на филмскиот фестивал Флипбук, предавање и лекторски часови по литература посветени на делото на Шопов, меѓународно чествување во рамки на Струшките вечери на поезијата, промоција на неговите книги, публикации како и научни собири во негова чест.
