Сопругата на претседателот, Елизабета Ѓоргиевска денеска во Шуто Оризари ја посети градинката ЈОУДГ „8 Април“ и оствари средба со Здружението Иницијатива на правата на жените Ромки од Шуто Оризари.
По повод 1 Јуни – Денот на детето, на група деца кои ја посетуваат градинката ЈОУДГ „8 Април“, сопругата на претседателот заедно со колешки од Стоматолошкиот факултет, им одржа предавање на тема „Орална хигиена“.
При посетата на градинката, Ѓоргиевска беше запознаена со условите и функционирањето на градинката изградена според највисоки стандарди за предучилишна установа, во чии рамки се и високите стандарди за енергетска ефикасност и за пристапност вклучувајќи инклузивна опрема за игралишта со цел да им се обезбедат на децата со попреченост еднакви можности со нивните врсници.
Во рамки на средбата со Здружението Иницијатива на правата на жените Ромки од Шуто Оризари, Ѓоргиевска се запозна со резултатите од нивните досегашни активности во областа на дискриминацијата, социјалната и здравствената заштита за чиешто остварување делуваат како параправнички и теренски работнички.
Здружението Иницијатива на правата на жените Ромки од Шуто Оризари својата примарна цел девојките и жените Ромки да ги остварат своите социјални, економски и здравствени права на еднаква основа со другите жени, ја реализира преку активности за едуцирање, застапување и зајакнување.