Претседателот Стево Пендаровски преку видео порака се обрати на отворањето на Вториот меѓународен конгрес на медицински сестри, што се одржува од 13 до 15 октомври во Струга во организација на Здружението на медицински сестри, техничари, акушерки и стоматолошки сестри „За нас“.
Почитувани медицински сестри, техничари, акушерки, стоматолошки сестри,
Почитувани членови на Здружението „За нас“,
Дами и господа,
Иако не сум во можност лично да бидам дел од овој Втор меѓународен конгрес на медицински сестри, ви благодарам за поканата и за можноста да ви се обратам преку видео порака за да ви посакам успешна работа.
Најпрво, сакам да ја поздравам соработката што ја остварувате со професионалните здруженија од регионот и пошироко, што претставува одлична можност за размена на знаења со вашите колеги и споделување на нови стручни достигнувања и практики, преку кои, уверен сум, придонесувате за унапредување на сестринството.
Здравствениот систем е еден од највиталните сегменти во секое општество, но, основата на квалитетната здравствена заштита, покрај инвестициите во опрема и техника, несомнено е инвестирањето во човечки ресурси – во квалитетни, професионални и стручни кадри.
Овој конгрес е можност за промовирање на сестринството, за улогата и важноста на медицинските сестри, важноста на здравјето на луѓето, како и можност за надградување на вашите знаења и стекнување на нови искуства, што е во крајна линија, од интерес за сите нас, за целото општество.
Дозволете да ви се заблагодарам за хуманиот и одговорен начин на работење до сега, како и за трудот што го вложувате, со цел, навремена и квалитетна грижа и нега на пациентите.
Пандемијата на Ковид-19 ја направи многу повидлива вашата професија, но, верувам дека во иднина поддршката што ќе ја добивате од институциите ќе биде многу поизразена и посилна, независно од тоа со какви предизвици ќе бидеме сите ние соочени.
Ви посакувам уште еден успешен конгрес, а на учесниците од Албанија, Босна и Херцеговина, Бугарија, Косово, Словенија, Србија, Турција, Хрватска и Швајцарија, им посакувам пријатен престој.
До гледање.
