Претседателот Стево Пендаровски учествуваше на Третиот самит за демократија насловен „Демократија за идните генерации“ што се одржа виртуелно во организација на Република Кореја. Претседателот се обрати на лидерската сесија на тема „Инклузивни општества и поттикнување на младите“.
Ваши екселенции,
Драги колеги,
Почитувани учесници,
Најпрво, дозволете ми да му се заблагодарам на претседателот на Република Кореја за поканата да учествувам на Третиот самит за демократија и да се обратам на денешната сесија којашто таргетира една исклучително важна тема, што верувам дека е меѓу приоритетите на секој од нас како лидери.
За да имаме инклузивни и праведни општества, мора да создадеме услови за секој поединец, независно од неговата етничка припадност, пол, сексуална ориентација, вероисповед, општествена положба, политичка определба, физички или интелектуален статус, да може соодветно да се интегрира, да се вклучи и рамноправно да учествува во сите сегменти на општеството и да биде прифатен во целост од заедницата.
За таа цел, неопходно е да продолжиме со подигање на јавната свест, рушење на предрасудите и стереотипите, унапредување на политиките и законската регулатива за спречување и заштита од дискриминација, и да обезбедиме постојана институционална поддршка. Само така ќе создадеме инклузивни средини, во кои знаењето, вештините и интегритетот на личноста ќе бидат пресудни за успехот.
Особено сум горд што на моја иницијатива како претседател беше усвоена Стратешката рамка за развој „МКД 2030” во која, меѓу четирите развојни области на кои се фокусира Северна Македонија, се токму младите и инклузивниот раст.
За да ги поттикнеме младите иднината да ја градат во сопствената држава, да бидат носители на позитивните промени, ќе продолжиме да инвестираме во нивното образование, да го поттикнуваме младинскиот активизам и да ги вклучиме во креирањето на политиките. Современото и инклузивно образование е каналот за социјална мобилност, што ќе им помогне на младите да имаат подобар живот од оној на нивните родители.
Ако колективно не се посветиме на зачувување на демократските вредности, ризикуваме младите луѓе да станат жртви на авторитарни и популистички идеологии, кои во последно време наоѓаат плодна почва дури и во високо развиените општества.
Уверен сум дека наша заедничка цел е идните генерации да живеат во општества во кои различностите ќе бидат влог во напредокот, а не основа за поделби.
Ви благодарам.