Во Кабинетот на Претседателот на Република Северна Македонија, под покровителство на сопругата на претседателот, Елизабета Ѓоргиевска, денеска се одбележа 75-годишнината од воспоставувањето на програмата „Фулбрајт“, во рамки на која, учествувале околу 400 илјади луѓе од целиот свет.
Истакнувајќи дека во изминативе децении програмата им овозможи професионален и личен развој на 298 македонски граѓани, Претседателот Пендаровски рече дека потребни ни се личности коишто ќе придонесуваат за развојот на општеството и на државата во сите области.
„Со „Фулбрајт“ и со другите меѓународни програми имаме додадена вредност и јасно можеме да ги видиме резултатите од инвестирањето во човечкиот капитал. Како земја која не е високо индустриски развиена, нема идеална географска положба и премногу природни ресурси кои ќе овозможат брз економски раст, мораме да се потпреме на нашите човечки ресурси. А тоа подразбира да овозможиме на позициите на кои се решава за квалитетот на нашите животи да дојдат најспособните, најобразованите, највештите, најмудрите и се разбира најморалните меѓу нас“, рече претседателот Пендаровски.
Како една од учесничките во „Фулбрајт“, сопругата на претседателот, Елизабета Ѓоргиевска, рече дека програмата не нуди само можност за професионално усовршување и стекнување знаење, туку и можност за запознавање различни култури, различни филозофии на живеење, комуникација и споделување искуства со луѓе со богато професионално, но пред се со огромно човечко и животно искуство.
„Гордост е да се биде дел од големото семејство на учесници во програмата „Фулбрајт“. Тоа е семејство на луѓе од различни меридијани, на луѓе од различни нации, различни вери, различни професии, различни интереси, но она што е заедничко за сите е посветеноста, желбата за усовршување и истражување, стремежот за подобро и поубаво, бидејќи сите ги води максимата: „Scientia vincere tenebras“ или „науката ја победува темнината“, рече во обраќањето Ѓоргиевска.
Сопругата на претседателот, Ѓоргиевска пред неколкуте присутни алумнисти на „Фулбрајт“ истакна дека во програмата досега учествувале 39 шефови на држави и влади, како и 60 добитници на Нобелова награда.
„Кога во 1946-тата година, претседателот Труман го потпишува визионерскиот акт за воспоставување на програмата „Фулбрајт“, никој не можеше да замисли дека и денес, по 75 години, не само што оваа програма ќе продолжи да постои, туку и ќе се проширува секојдневно, дека ќе функционира глобално во повеќе од 160 држави од светот“, додаде Ѓоргиевска.
На одбележувањето на 75-годишниот јубилеј на програмата „Фулбрајт“ во коорганизација со Амбасадата на САД, се обратија и амбасадорката Кејт Мери Брнс, министерката за образование и наука, Мила Царовска, а преку видео-порака се обрати и Маријана Крејвен, в.д. заменик-помошник државен секретар за академски програми во Бирото за образовно-културни работи на Стејт Департментот.