Presidentja Gordana Siljanovska Davkova sot i pranoi letrat kredenciale të Doris Axho Denjo Brese, ambasadori i sapoemëruar i Republikës së Ganës me seli në Pragë.
Në ceremoninë e dorëzimit të letrave kredenciale, Presidentja Siljanovska Davkova theksoi se shteti ynë i kushton rëndësi zhvillimit të marrëdhënieve me vendet afrikane, veçanërisht me Ganën, e cila ishte vendi i parë në jug të Saharasë që fitoi pavarësinë në procesin e dekolonizimit.
“Duke pasur parasysh angazhimin e Ganës për zhvillimin e mëtejshëm të ekonomisë dhe demokracisë së saj, jam e bindur se ka hapësirë për zgjerimin e bashkëpunimit tonë në planin ekonomik, kulturor dhe ndërkombëtar. Për këtë nevojitet përforcimi i mëtejshëm i kornizës ligjore dhe shpresoj që të gjitha marrëveshjet që tashmë janë harmonizuar do të nënshkruhen sa më shpejt”, tha Presidentja Siljanovska Davkova.
Duke shprehur kënaqësinë për bashkëpunimin në fushën e arsimit dhe shkencës dhe interesin e shprehur të studentëve ganezë për të studiuar në Universitetin e Shkencave dhe Teknologjive të Informacionit “Shën
Apostull Pavle” në Ohër, Presidentja shprehu shpresën se ky bashkëpunim do të vazhdojë edhe në të ardhmen, me mundësi që të thellohet edhe më tej.
Në fjalën e saj, ambasadorja Brese theksoi se Gana e vlerëson miqësinë shumëvjeçare dhe të përzemërt që ekziston midis dy vendeve që nga vendosja e marrëdhënieve diplomatike, bazuar në përkushtimin e përbashkët për të njëjtat vlera: demokracia, të drejtat e njeriut, sundimi i ligjit, siguria dhe prosperiteti.
Ajo vuri në dukje se Gana u kushton rëndësi të madhe iniciativave të përbashkëta për të thelluar bashkëpunimin në sektorët kyç të ekonomisë së tyre, veçanërisht teknologjinë, shëndetin, bujqësinë, energjinë e rinovueshme, prodhimin, turizmin dhe arsimin. Në këtë kontekst, ambasadorja Brese theksoi se i inkurajon investitorët nga vendi ynë që të përfitojnë nga klima tërheqëse dhe e favorshme e investimeve në Ganë.
Presidentja Siljanovska Davkova i uroi suksese ambasadores Doris Axho Denjo Brese në zbatimin e detyrës me përgjegjësi.
