Presidentja Gordana Siljanovska Davkova sot u takua me Zheljka Cvijanoviq, anëtare e Presidencës së Bosnjës dhe Hercegovinës në Tivat, Mali i Zi ku po marrin pjesë në takimin e liderëve të vendeve pjesëmarrëse në Procesin Bërdo Brioni.
Në këtë takim u shpreh kënaqësia për marrëdhëniet e shkëlqyera miqësore dhe bashkëpunimin ndërmjet dy vendeve, të cilat karakterizohen nga përkrahja dhe respekti i ndërsjellë, ndërsa u shpreh interes për avancimin e mëtejshëm të dialogut politik dhe thellimin e bashkëpunimit bilateral në të gjitha sferat me interes të përbashkët, mbi të gjitha në planin ekonomik.
Presidentja Siljanovska Davkova e shprehu mbështetjen maqedonase për aspiratat evropiane dhe euroatlantike të Bosnjës dhe Hercegovinës, si dhe gatishmërinë tonë për të shkëmbyer përvoja me BeH.
Të dy bashkëbiseduesit konstatuan se përparimi i bashkëpunimit rajonal me qëllim përballimin me sfidat, si dhe përparimi i integrimit evropian të vendeve të Ballkanit Perëndimor, janë të një rëndësie vendimtare për stabilitetin dhe prosperitetin e rajonit.
Në këtë takim u diskutua edhe për përmbytjet e javës së kaluar në Bosnjë dhe Hercegovinë, ku Presidentja Siljanovska Davkova shprehu ngushëllimet e saj të thella për familjet e viktimave dhe shërim të shpejtë për të lënduarit.
